يمكن سألت نفسك السؤال دا قبل كدا بس صعب جدا نجزم ان القالب الفلاني هو افضل قالب في كل حاجة.. وهل افضل دي تقصد بيها افضل قالب مقابل السعر ولا افضل قالب في المطلق وهل افضل في السرعة والاداء ولا افضل في الـSEO ولا افضل في سهولة الاستخدام والبناء؟
لو جه في بلك افضل في كله فللأسف مفيش حاجة افضل في كله، بس كمل قراية وهقولك افضل حاجة للبيزنيس بتاعك ايه!!
مبدئيا فيه عوامل كتير بتحدد بيها القالب الافضل من التاني والظريف في الموضوع ان العوامل دي نفسها بتتغير على حسب المشروع بتاعك.. على سبيل المثال لو انت موقعك موقع شركات فهيكون احتياجاته مختلفة تماما عن المدونات او المواقع الاخبارية او المتاجر الالكترونية او صفحات الهبوط او غيرها
طيب تمام لنفترض اني متجر الكتروني ها ايه بقى افضل ثيم؟
برضو مقدرش اقولك لان بعد معرفه نوع موقعك لازم تحدد العوامل اللي اتكلمنا عنها فوق، انا هنا هكلمك في القالب او في الثيم بشكل عام ومش هاخد اعتبار للسعر في اى حاجة لانك بتعمل بيزنيس ولازم تصرف عليه، بس هقولك امتى تاخد السعر في الاعتبار وامتى لا… فركز معايا شوية
العوامل الاساسية لاختيار القالب
- سهولة استخدام القالب والتعديل عليه
- التعديل الـLIVE
- الـPage Builder
- الأداء والسرعة
- مميزات وامكانيات الثيم او امكانيات الـTheme Option
- الظهور على محركات البحث
- الديموز المتوفرة
- الدعم الفني
- الـDocumentation
- السعر
دي باختصار العوامل الرئيسية اللي بتأثر على اختيارك لاي ثيم حلونا بقى نتشرح بالراحة واحدة واحدة وركز معايا
سهولة استخدام القالب والتعديل عليه
1. فيه ثيمات معقدة وعشان تعدل عليها بتتعب جدا وبتتعب اصلا في فهم القالب وكل شوية هتضطر ترجع للdoc عشان تقرا وتفهم وتعمل سيرش واحيانا بتوصل لانك تكلم الدعم من كتر التعقيد وساعات بيكون فيه اعطال وكلام من دا فانت لازم تشوف الreviews قبل ما تشتري او تشتري نسخة gpl وتجربها الاول ولو عجبتك بتشتري القيم الاساسي
التعديل الـLIVE
2. فيه ثيمات مش بتوفر التعديل على الثيم اوبشن بتاعها لايف ودا بيخليك تخرج وتخش كل شوية وتعمل ريفرش ودا بيزود عدد ساعات شغلك بشكل ملحوظ وبيتعبك في الشغل
الـPage Builder
3. القالب بيدعم انهي بيدج بيلدر؟ في الغالب الناس شغالة على واحد بس ومرتاحة فيه فانت لازم تختار ثالب بيدعم البيدج بلدر اللي انت متعود عليه عشان ميدوخكش وحرفيا هتدوخ وهتلف كتير لو دخلت حاجة مش فاهمها وهتضطر تشوف فيديوهات وتخش على dox البيلدر نفسه طبعا لو عندك وقت انطلق بس حاول ميكنش دا وقت تنفيذك لمشروع حقيقي
الأداء والسرعة
4. الثيمات المحترمة بتوفة minify للcss والjs وملفات تانية وبيمسح ال cache وبيعمل وظايف تانية كلها متعلقة بالسرعة والاداء، لو الثيم مش بيوفر حاجة زي كدا اخلع على طول، وعشان تعرف الثيم بيوفر دا ولا لا مش هتعرف الا اما تجرب او تسأل حد جرب
مميزات وامكانيات الثيم او امكانيات الـTheme Option
5. فيه ثيمات تانية بتوفر امكانيات محدودة في التعديل على الواجهه ودا بيخليك تستخدم كود css كتير وفي الغالب مش هتضايق لو بتعرف تكتب كود css بس برضو هياخد منك وقت المشكلة بقى هنا هتكون في لو مش بتعرف تكتب css هتدبس
الظهور على محركات البحث
6. مش كل الثيمات بتوفر الseo بس دا عامل برضو من عوامل اختيارك للثيم ومش مهم اوي لان لو مفهوش seo تقدر تنزل plugins خارجية بس لو فيه هيكون افضل لانه هيغنيك عن اللجوء لاي بلجن تاني خارجي
الديموز المتوفرة
7. لازم يكون الثيم فيه ديموز كتير عن النوع بتاع موقعك يعني لو متجر فلازم يبقى عندك ديموز متاجر كتير عشان تختار منها براحتك او تخلي العميل يختار معاك، عشان كدا لازم تكون عارف نوع الموقع عشان بناءا عليه تحتار الثيم اللي بيوفر ديموز كتير لنوع الموقع بتاعك
الدعم الفني
8. الدعم اهم حاجة في الوجود، مهما كنت محترف هتقابلك مشاكل هتحلها في الاخر بس محدش هيعرف يساعدك زي ما الدعم هيساعدك ولا شركة ولا جروب ولا حد متخصص فعشان كدا اختار ثيم الدعم بتاعه يكون كويس وبيرد على طول وبيساعدك ومتعاون معاك
الـDocumentation
9. الثيم اوبشن طبيعي مش هتفهمه كله ومش هتفهم الثيم كله فلازم مرجع اساسي تظبط بيه حالك.. المرجع هنا الdoc كل ثيم لازم بيعملdoc للثيم عشان الناس تقدر تستخدم الثيم وتعدل وتغير الكلام دا دا بالمعنى البلدي هو الكتالوج اللي بييجي مع الثيم فيه كل الارشادات اللي هتحتاجها لو المطورين بتوع الثيم عاملين doc وحش فبلاش تشتريه الا لو انت عارف الثيم وبتعرف تستخدمه 100% هتقولي ممكن ابقى اسأل الدعم هقولك ساعات بيطلبوا فلوس عشان يساعدوك في حاجة ممكن تكون خارج نظاق خطة الدعم المجانية بتاعتك
السعر
10. السعر كله موحد وهو 60 دولار لاي ثيم واحب اقولك انك لو جبته null هتتئذي جامد واسأل الناس اللي مجربه.. اوعى تشتري حاجة ارخص لمجرد انها ارخص واوعى تسترخص في حاجة اغلى لمجرد انها اغلى، ابحث كويس واعرف اللي انت محتاجه وادرس الموضوع عشان تشتري صح حتى لو كان ب دولار واحد المهم اختيارك يكون صح لانه هيوفر عليك بلجنز خارجية ممكن تكون بفلوس او مساعدات من شركات او فري لانسرز وهياخدوا منك فلوس برضو
بس كدا اتمنى يكون الشرح مفيد للجميع
